AlterPresse
Ayiti-Repiblik dominikèn : Plante pikèt pou denonse demach rache nasyonalite dominiken
Dec. 9, 2011, midnight
Pòtoprens, 9 des. 2011 [AlterPresse] --- Jedi 8 desam 2011 la, plizyè santèn moun ki viktim anba politik rache nasyonalite Jent Santral Elektoral Repiblik Dominikèn nan ap aplike, te plante pikèt yo devan palman dominiken nan Santo domingo pou denonse sitiyasyon ensekirite devan lalwa administrasyon politik prezidan Leonel Fernandez la kreye, dapre enfòmasyon ki rive jwenn AlterPresse.Yo te soti Puerto Plata (nan Nò Sendomeng), La Romana, El Seybo, Monte Plata, San Pedro de Macorís (ès) ak nan kapital la pou vin lonje dwèt sou desizyon pi gwo lakou jistis Sendomeng pran pou rekonèt Jent Santral elektoral la ka bay dokiman administratif. Dapre lalwa peyi sa a se tribinal premye enstans ki gen konpetans sa a.Lavèy selebrasyon Deklarasyon Inivèsèl Dwa Moun, 10 desam k ap pwoche la, li pa korèk pou pi gwo lakou Jistis (suprema corte de justicia / Scj) dominikèn ap ankouraje lalwa fè bak pou al rache dwa nasyonalite dominiken te deja genyen, dapre patisipan yo.Lakou Siprèm Repiblik Dominikèn sot konfime semenn pase a yon jijman rache nasyonalite ki te soti 12 novanm 2011. Zak sa gen tandans pou ranfòse ensikirite devan lalwa yon pakèt sitwayen dominiken fanm kou gason yo refize dwa pou gen nasyonalite dominikèn, ap viv.Depi lè JCE a te bay tèt li dwa anile nan nivo administratif dwa pou pote nasyonalite dominikèn nan, plizyè milye moun tonbe nan sitiyasyon tèt chaje, san nasyonalite devan lalwa. Pifò moun ki gen orijin ayisyèn sa yo pèdi dwa pou gen dokiman administratif tankou batistè, pyès idantite ki ka penmèt yo viv tankou moun plen kon ze, dapre sa òganizatè pike pikèt 8 desam yo di.Plizyè pitit ayisyen ki fèt sou bout tè dominiken an pa rive jwenn dokiman administratif pou kontinye etid yo nan lekòl.Patisipan nan plante pikèt 8 desam la pa t bliye voye yon ochan pou militant dominikèn Sonia Pierre ki te mouri dimanch 4 desam la epi ki te antere 7 desam nan vil kote l te fèt, Villa Altagracia. Sonia Pierre te fonde mouvman fanm dominikano-ayisyèn (MUDHA).Aktivite sa a devan Kongrè Nasyonal Dominiken an se yon siyal tou nèf òganis k ap defann dwa moun yo voye pou di y ap kontinye batay Sonia a. Militant sa a te konsakre lavi l nan lit pou pitit ayisyen ki fèt Sendomeng rive jwenn nasyonalite dominikèn.Se yon rèl mobilizasyon pou envite sila yo ki idantifye yo ak kòz jistis, dwa pou nasyonalite nan Repiblik Dominikèn, dapre sa òganizatè yo fè konnen.Se MUDHA, Rezo Jacques Viau ak Mouvman pou yon Rejis Sivil san Diskriminasyon (movimiento por un registro civil libre de discriminación) ki te òganize plante pikèt sa a. [efd kft gp apr 9/12/2011 11:50]